Det skjer store og raske endringar i dagens samfunn. Krig i Europa har gjort kvardagen meir utrygg, ikkje berre i Ukraina, men i heile verda. Tal på flyktningar aukar og migrantar kjem til Europa i store tal. Klimakrisa angår oss alle og har dei største konsekvensane for menneske i fattige land. Koronapandemien er over i vårt samfunn, men mange slit med etterverknader. Når kjem neste pandemi?

Globaliseringsprosessar har gjort at verda blir mindre, men samstundes er det stadig fleire som blir ståande utanfor. Fattigdom, manglande rettar og utnytting av svake grupper er eit globalt problem. Korleis stiller kyrkjene seg til alle desse endringane i samfunnet? Korleis er kyrkja endra? Kyrkja står i spagat mellom «business as usual» og å ta innover seg kva desse endringane skal bety.

Fagdagens tematikk

Fagdagen dette året startar med å ta opp kva praktisk-teologiske utfordringar alle endringane rundt oss skaper, lokalt og globalt. Kva betyr dei for undervisninga og forskinga vår? Me får to perspektiv på utfordingane: eit folkekyrkjeleg og eit frikyrkjeleg. Finst det skilnader? Kva er fellesnemnarane? Det blir lagt opp til samtale, spørsmål og drøfting av dette temaet, og me ønskjer å involvera så mange som mogleg.

Etter lunsj og parallelle papersesjonar blir nokre av utfordringane tematisert: Kva haldningar finst i Den norske kyrkja til kristne migrantar og kva erfaringar har migrantar i møte med ho?«Teaching and Learning in Crisis» set søkelyset på korleis undervisning, som tar inn over seg både lokale og globale perspektiv i møte med kriser, kan sjå ut i ei ny tid. Kanskje ungdomsarbeid kan vera ein stad der me ser klarare enn andre stader korleis framtida si kyrkje kan sjå ut? Me får presentert ei heilt ny akademisk handbok i forsking på ungdomsarbeid.

Call for papers

Dei som ønskjer å presentera eit prosjekt/paper innan det praktisk-teologiske feltet, markerer dette i nettskjemaet for påmelding og legg ved eit kort samandrag (inntil 200 ord). Relatér gjerne paperet ditt til hovudtemaet for fagdagen.

Frist for påmelding og abstract på nettskjema, så fort som mogleg og seinast 21.april.